Proclamatie Prins Theo d’n Twèdde
Prins carnaval 1988 van de Wagellaars, beej de graassie van alle Waggelaars en 60-plussers, Bekéénde opvolger van oonze charmante Prins Ruud den uurste. Grootheerser over ’t belastingkantoor en pliesieburoo, beschermheer van de kuulwei en de Ark, bewaorder van alle sorte póstzegels, gezien lid van de schoefelploeg van den dééke, gebôre op den doeveakker en daor woone we nog, agrarier van huus uut mit de bééste asperjes vör Piet van Nöl.
Laote weete an alle Waggelaars, de volgende benoemingen:
As mien prinses, mien eige Anna,
As urste Adjudaant, Hen Bongers
As twèdde Adjudaant, Wim Willems
As Schorriemorrie’Theo Velemans
Verder blieft alles ze-as ’t was en vaordige wej de volgende proclamasie uut:
1).Weej wille op den doeveakker gén beulte ien de straot hebbe.
2).Wel motte der veul rommelweenkels komme ien de Poel, daor haalde weej van.
3).Al die vliegmachines maken oons nog gekker as dat we al zien.
4).Oonder de maosbrug keunde now op de baank gaon zitte visse.
5).As de Nierst nie ze stoonk koste dat daor ok wel.
6).Beej den Déékemotte vort an ’t opstaon blieve asof ene keer per dag nog nie moi zat is.
7).Op den tóren van de kerk hebbe ze de verleechte klok der af gehaold, now keunde nie mér mit twee man tegeliek kieke hoe laot ’t is.
8).Iedereen mot bezunige, mar hoe mot da now as ge al niks hèt?
9).Den borrel meug gerust duurder worre als ie ok mar gröter werd.
10).’t werd hoog tied dat ter ’n groote zaol keumt, weej kunne hier oons koond al host nie mer drééje.
11).Laote we ’t Heiderbos toch mar gröter maake, da schaait nooit.
Aldus vörgelééze en dör ollie allemol goed oonthaalde, gedaon te Gennep den 1e fibrewaori 1900+8 x 11
Mien leus vör dees daag is:
Mak veul schik en dreenk enne goeie, laot mit da goeie grein ie knoeie,
mar toch steeds de kerk ien de midde, dan kan niemand teggen ow zeggen: ‘Daor lidde’